Ботсванада 350-ден астам піл белгісіз жағдайда қырылып қалды
«Пілдердің осылай жаппай қырылуы көптен бері болмаған», - деп мәлімдеді «Ұлттық паркті құтқару» британдық қайырымдылық ұйымының табиғатты қорғау директоры Найл Макканн.
Оның айтуынша, бұл оқиға адамдардың өмірі мен денсаулығына да қауіп төндіруі мүмкін.
Ғалым Ботсвана африкалық пілдердің үштен бірінің үйі екенін, олардың 10%-ы осы жерді мекендейтінін, сол себепті бұл жайт әлемдік популяцияға қатты әсер етуі мүмкін екенін атап өтті.
Британдық БАҚ хабарлауынша, пілдердің жартысының денесі су айдындарының маңынан табылған.
Куәгерлердің айтуынша, тірі жануарлардың да әрекеті біртүрлі: олар айналып жүреді, бағытын өзгертуге шамасы жоқ және әлсіз көрінеді.
Жаппай қырылу себептері әзірге белгісіз. Уланып қалуы немесе қандай да бір індет тарауы мүмкін деген нұсқалар қарастырылып жатыр.