12:49, 26 Мамыр 2020 | GMT +6
Дәрігерлер блокпоста зардап шеккен үшінші полицейдің жағдайын айтты
АЛМАТЫ. ҚазАқпарат – Алматыда блокпостта болған жол апатында зардап шеккен полиция қызметкерінің жағдайы белгілі болды, деп хабарлайды ҚазАқпарат тілшісі.
Қалалық қоғамдық денсаулық басқармасының хабарлауынша, пациент №7 қалалық клиникалық ауруханаға жеткізілген.
«Тексеру барысында компьютерлік томография нәтижесінде қосарласқан жарақат, басының шүйде бөлігінің жарақаты, ми соққы алғаны анықталды. Бас сүйегінің артқы бөлігіне қан кеткен. Бет сүйегінің сол жағы сынған. Басының, бетінің, белінің жұмсақ тіндері соғылған. Нейрохирургтардың консилиумы өткізілді. Нәтижесінде бас сүйегі ашылып, ұйыған қан алынды. Қазір жағдайы ауыр. Жансақтау бөлімінде жатыр», - деді №7 аурухана бас дәрігерінің хирургия бойынша орынбасарының міндетін атқарушы Ильдар Құрмаев.