Экософия тұжырымдамасы - балаларға экологиялық білім берудегі Президент тапсырмасымен үндеседі - министр

None
None
НҰР-СҰЛТАН. ҚазАқпарат – Жаңа экологиялық этиканы қалыптастыруға үндейтін - экософия тұжырымдамасы іс-шаралар кешені қарастырылған. Бұл туралы ҚР Ақпарат және қоғамдық даму министрі Аида Балаева мәлім етті, деп хабарлайды ҚазАқпарат тілшісі.

«Біз рухани бай ұрпақ қана емес, бәсекеге қабілетті ұрпақ тәрбиелеуге тиіспіз. Өйткені, бәсекеге қабілеттілік – табысты ұлт болудың басты шарты. Соның ішінде жеке адам болып емес, тұтас халық болып сапаны көтеру басты мақсат.

Бұл ретте, бағдарлама аясында бәсекеге қабілетті, жан-жақты дамыған ұрпақ қалыптастыруға арналған – «Ulttyq tárbıe», жастардың ғылыми жетістіктері туралы – «Ақылды ұрпақ» жобалары жүзеге асып жатыр», - деп тоқталды министр Сенатта «Ұлттық құндылықтар – рухани жаңғырудың негізі» тақырыбындағы дөңгелек үстел отырысында.

Сонымен қатар А. Балаева «Қазақи тәрбие-таным» жобасында – кітап оқитын жастардың санын арттыру, олардың жоғары эстетикалық талғамын қалыптастыру, бос уақытты тиімді жоспарлау сияқты мақсаттар көзделгенін атап өтті.

«Бұған қоса, заманауи сұранысқа ие мамандықтар туралы ақпар беретін – «кәсіптік бағдарлау», сондай-ақ, ресурс үнемдеу мен жаңа экологиялық этиканы қалыптастыруға үндейтін – экософия тұжырымдамасы іс-шаралар кешені қарастырылған. Бұл – өз кезегінде, Президентіміз Қасым-Жомарт Кемелұлының балаларға экологиялық білім мен тәрбие беру бойынша жүктеген тапсырмасына үндесетін жоба болмақ», - деді ведомство басшысы.

Биылдан бастап әрбір қазақстандықтың санасын көтеріп, азаматтық жауапкершілігін арттыруға арналған «Еңбек – елдің мұраты», «Құқықтық мәдениет», «Үнем – қоғам қуаты», «Дәстүр мен ғұрып» сияқты жаңа жобалар іске қосылды.

Азаматтардың жеке және кәсіби қабілеттерін дамытуға арналған «Үнем – қоғам қуаты» жобасы аясында, қаржылық сауаттылықты арттыру, өзін-өзі жетілдіру, дұрыс мінез-құлық нормаларын қалыптастыру, цифрлық және медиа-сауаттылықты дамыту мақсаттары қарастырылған.

«Дәстүр мен ғұрып» жобасында халқымыздың салт-дәстүрі мен әдет-ғұрпын дәріптеп, ізгі тәрбиеге үндейтін, заман талабымен үндесетін құндылықтарды өскелең ұрпаққа насихаттау көзделген. Бұл орайда, «rruh.kz» порталында ұлттық салт-дәстүрге қатысты танымдық-ақпараттық материалдар үнемі жарияланып отырады.


Соңғы жаңалықтар