Еліміздегі оқ-дәрі сақтайтын 44 нысанның шекарасы айқындалады

«Қорғаныс министрлігінің қоймалары мен оқ-дәрілері бар арсеналдарының жанында аумағында тыйым салынған аймақтар мен аудандар белгіленген жер учаскелерін мемлекет мұқтажы үшін иеліктен шығару, сондай-ақ оқ-дәрілерді сақтаудың қазіргі заманғы қоймаларын салу бойынша жүргізіліп жатқан жұмысқа қатысты депутаттық сауалды қарап, мынаны хабарлаймын. Қорғаныс министрлігінің ақпараты бойынша, Қарулы Күштердің, басқа да әскерлер мен әскери құралымдардың арсеналдары, базалары мен қоймалары жанындағы тыйым салынған аймақтар мен аудандардың тізбесіне сәйкес (Қазақстан Республикасы Үкіметінің 2021 жылғы 15 қаңтардағы қаулысы). № 9) Қарулы Күштерде ірі калибрлі оқ-дәрілерді сақтайтын 44 нысанның айналасындағы тыйым салынған аймақтардың (аудандардың) шекарасы айқындалуға жатады», - деді Асқар Мамин депутаттық сауалға берген жауабында.

Оның айтуынша, нысандардың айналасындағы тыйым салынған аймақтардың жоспарлары мен схемаларын Қорғаныс министрлігі тиісті әкімдіктерге жолдауы керек.

Осылайша Жер кодексінің 16-бабының 10-4-тармағы бойынша, қорғаныс және ұлттық қауіпсіздік үшін қажет жер учаскелерін беру және алып қою облыстың, республикалық маңызы бар қаланың, астананың жергілікті атқарушы органының құзыретіне жатады.

«Қазіргі уақытта 15 нысан бойынша тыйым салынған аудандарды белгілеу қажеттілігі жойылды, өйткені олардан ірі калибрлі оқ-дәрілер шығарылды. Қарағанды (4), Жамбыл (4) және Ақтөбе (1) облыстарында 9 нысан бойынша келісім бар, олар бойынша тыйым салынған аймақтар шегіндегі жер учаскелерін иеліктен шығару үшін қаржы қаражаты талап етілмейді. Қалған 20 нысан (Алматы (9), Шығыс Қазақстан (6), Маңғыстау (2), Қарағанды (1), Түркістан (1) облыстары мен Шымкент қаласында (1) орналасқан. Үкімет мәселелерді кешенді және жүйелі шешу бойынша шаралар қабылдауда. Өйткені тыйым салынған аймақтар мен аудандардың әрекетіне ірі елді мекендер, жеке меншік және басқа да мүлік жатады», - делінген Үкімет башысының жауабында.