Елорда саябағында діни конфессиялардың өкілдері ағаш отырғызды

Бұл акция жыл сайын дәстүрлі түрде Қазақстан халқының бірлігі күніне ұйымдастырылып келді. Биыл коронавирус инфекциясының пандемиясына орай Қазақстанда жарияланған төтенше жағдай режиміне байланысты межеленген уақытта өтпей қалды.

Нұр-Сұлтан қалалық мәслихатының депутаты Мирас Шекенов – бүгін Конфессияаралық келісім аллеясында ағаш отырғызғандардың бірі. «ТЖ режимі алынды, елорданың саябақтары ашылды. Екі аптаға кешіксе де, акция өтті. Қазақстандағы барлық конфессиялардың жетекшілері ағаш отырғызды. Мұндай акциялар Қазақстанның халқы бірге екенін көрсетеді. Ең бастысы – осы!», - деді М.Шекенов.

Елорданың бас имамы Ерболат Жүсіпов акцияның маңыздылығын айта отырып, Мұхаммед Пайғамбардың (с.ғ.с) хадисін еске алды. «Ол «Кімде-кімнің қолында бір шыбығы болса, Қиямет басталды десе де дереу шыбығын ексін» деген. Хадистің мағынасы әр мұсылман өз елінің дамуы мен көркеюіне үлес қосуы тиіс дегенді білдіреді. Қазақстанда ортақ мақсат – біздің ортақ үйімізді дамытуға мүдделі түрлі конфессиялардың өкілдері өмір сүреді», деді Нұр-Сұлтанның бас имамы.

Өз кезегінде Нұр-Сұлтан қаласының астаналық Христиан Інжіл шіркеуінің пасторы Александр Клюшев ағаш отырғызу акциясы Қазақстандағы конфессияаралық келісімнің көрінісі екенін айтты. «Енді біз көшеттерді күтіп, баптаймыз. Әрі бұл осы ағашты отырғызған жандардың жүрегіне жылулық сыйлайтын болады, тіпті ағашты кім отырғызғанын білмейтін адамдар үшін де», - деді ол.

Акцияны Нұр-Сұлтан қаласының Дін істері басқармасы ұйымдастырды. Оның мақсаты – қоғам назарын қаланың тазалығын сақтауға, экологиялық мәдениетті қалыптастыру және ұлтаралық татулыққа аудару.