Елорда тұрғыны ойын алаңында жүрген балаларды бір-бірімен төбелесуге мәжбүрледі
«Әлеуметтік желілерге жүргізілген мониторинг жұмыстары барысында ер адамның балаларды төбелесуге мәжбүрлеген видеосы анықталды. Аталған факті бойынша полицияға 37 жастағы қала тұрғыны жеткізілді. Ол Бабатайұлы кұшесіндегі ойын алаңында өзінің 8 жастағы баласы мен оны ренжіткен 11 жастағы баланы төбелесуге шақырған»,-деп мәлімдеді Нұр-Сұлтан қалалық Полиция департаментінің баспасөз қызметі.
Төбелес салдарынан 11 жастағы бала жарақат алған. Зардап шеккен баланың анасынан кінәлі азаматқа шара қолдану туралы арыз түсті.
Полиция сонымен қатар ер адамның әкімшілік жауапқа тартылғанын хабарлады. Іс материалдары процессуалдық шешім шығару үшін мамандандырылған ауданаралық сотқа жолданды.
Гұр-Сұлтан қаласының Полиция департаменті ересектер тарапынан мұндай қадамдарға жол берілмейтінін ескертеді. Қолданыстағы заңнамаға байланысты балалардың құқықтарының бұзылғаны, олардың денсаулығына зақым келтіргені үшін жауапкершілік қарастырылған.