Елордада «Керуен» мен «Әбу-Даби Плазада» вакцина егу бекеттері ашылады
«Қалада 100 егу кабинетінде вакциналауға жататын контингенттерді қамту жұмысы жалғасуда, оның ішінде «Mega Silk Way» және «Хан шатыр» сауда-ойын орталықтарында егу пункттері ашылды, сондай-ақ басқа да сауда-ойын орталықтары мен сауда үйлерінде ашу жоспарда қаралуда. Қазіргі уақытта адам көп жиналатын жерлерде қосымша егу кабинеттерін ашу бойынша дайындық жұмыстары жүруде. Жақын арада мұндай пункттер «Керуен» сауда-ойын-сауық орталығы мен «Әбу-Даби Плаза» кешенінде де ашылады», - деді С. Бейсенова елорда әкімдігінде өткен брифингіде.
Спикердің айтуынша, сауда-ойын-сауық орталықтарында да медицина ұйымдары секілді барлық санитариялық-эпидемиологиялық талаптар сақталады.
«Бұл талаптар – бөлме жиынтығы, жарақтандыру, жылжымалы егу пункттерін аймақтарға бөлу және т.б. Қазіргі уақытта департамент мамандары осы мәселелердің барлығын пысықтап жатыр», - деді спикер.
Айта кетейік, елордада эпидемиологиялық жағдай әлі де құбылмалы, қалада күніне 350-ден 650-ге дейін жағдай тіркеледі.