21:50, 04 Наурыз 2020 | GMT +6
Елордадағы «Нұрсая» тұрғын үй кешенінен өрт шықты
НҰР-СҰЛТАН. ҚазАқпарат - Елордадағы «Нұрсая» тұрғын үй кешенінен өрт шықты. Бұл туралы ҚР ІІМ Төтенше жағдайлар комитеті мәлім етті, деп хабарлайды ҚазАқпарат тілшісі.
«4 наурыз күні сағат 19-59-да Нұр-Сұлтан қаласының «101» пультіне Достық көшесі бойындағы «Нұрсая-2» тұрғын үй кешенінен өрт шыққаны туралы хабарлама түсті. Оқиға орнына елордалық ТЖД жеке құрамының 27 маманы мен 6 өрт сөндіру техникасы аттанды», - деп атап өтеді комитет өкілдері.
Ведомство мәліметінше, төтенше жағдай қызметкерлері тұрғын үй кешеніне жеткен кезде 8 қабаттағы пәтерлердің бірінен қою түтін байқалған.
«Керме төбе мен жиһаздар жанған. Қабылданған шаралардың арқасында қызыл жалын сағат 20-46-да сөндірілді. Тілсіз жау шарпыған аумақ шамамен 50 шаршы метрді құрайды. Зардап шеккендер мен қаза тапқандар жоқ», - делінген таратылған ақпаратта.