«Іле Алатауы» паркіндегі шыршалар күні-түні күзетіледі

Жаңа жыл қарсаңында мереке символы шыршаны заңсыз отайтындардың қатары көбейеді.

«Жасыл желекті қорғау мақсатында Іле Алатауы паркінде кезекшілік кестесі құрылды. Парктің 12 бақылау-өткізу пунктінде тәулік бойы кезекшілік тұратын болды», - делінген ұлттық парктің Facebook-тегі парақшасында.

Мамандардың айтуынша, қылқанжапырақты ағаштарды кескен жағдайда ҚР Үкіметінің №441 қаулысына сәйкес кесілген бір шыршаның орнына 15 АЕК, яғни 36 мың теңге айыппұл салынады. ҚР ҚК 340-бабының 2-тармағы бойынша 160 АЕК, 384 мың теңгеге дейін айыппұл салынып немесе 40 тәулікке қамалуы ықтимал.

«Халықтан табиғатқа ұқыптылықпен қарауын сұраймыз. Жүздеген жыл бойы өсетін шырша ағаштарын бір сәтте отауға болмайды. Мәңгі жасыл ағаштарды ұрпағымызға да қалдыруымыз керек», - дейді Іле-Алатауы ұлттық паркінің қызметкерлері.