Қарапайым заттар экономикасы: Атырау облысында 33 млрд теңгенің жобалары іске асырылуда

Облыстық кәсіпкерлік және индустриалды-инновациялық даму басқармасының басшысы Әбдуахит Әбішевтің мәліметінше, биыл блок-контейнерлер мен модульдік ғимараттар материалын өндіретін бір жоба іске қосылған. Кәсіпкерлікті қолдау картасы аясында жалпы құны 15,8 млрд теңгеге 8 инновациялық жоба іске қосылып, 600-ден астам жұмыс орны ашылады. Соның ішінде металл бұйымдарын шығаратын цех, полипропилен қаптарын шығаратын өндірісті кеңейту, құс етін өндіретін және бройлер балапанын бордақылайтын құс фабрикасы, медициналық маска, инфузиялық ерітінділерді құюға арналған құрылғы шығаратын және ас тұзын өндіретін зауыт сияқты жобалар іске қосылады. Ал 2021 жылы үй құрылысы комбинаты мен тоқыма емес материалдар шығаратын зауытты (спанбонд, мельтблаун) іске қосу жоспарланған.

«Қарапайым заттар экономикасы» бағдарламасы аясында тоғыз салада 33 млрд теңгеге бағаланған 103 жоба іске асырылуда. Оның ішінде құрылыс материалдарын өндіретін 11 жоба, жеңіл өнеркәсіпте – 16, тамақ өнеркәсібінде – 15, аграрлық салада – 38, қызмет көрсетуде – 7, химия өнеркәсібінде – 6, жиһаз өндіруде – 5 және машина жасау мен фармацевтикада бір жобадан бар», - дейді Әбдуахит Әбішев.

Сондай-ақ, екінші деңгейдегі банктер мен Аграрлық-кредиттік корпорация 8,4 млрд теңгеге 40 жобаны қаржыландыруды мақұлдаған. Сол жобалардың ішінде бахила шығару, бетоннан жасалған құрылыс материалдарын өндіру, 9 балабақша мен бір мектептің құрылысы, жиһаз өндірісі бар. Ал 31 жоба аграрлық саланың мал шаруашылығы бағытында іске асырылмақ. Бұған қоса, банктер мен қаржы институттары 6,1 млрд теңгені құрайтын 6 жобаның тиімділігін зерттеп жатыр.