Қауіпсіз жол: Ақмола облысында бір күнде жол ережесінің 677 рет бұзылғаны анықталды

Ведомствоның мәліметінше, 2020 жылғы 18-20 қараша аралығында облыс аумағында «Қауіпсіз жол» республикалық жедел – алдын алу шарасы өтті. Оның мақсаты - жол-көлік оқиғаларына байланысты жағдайды сауықтырып, жолда болатын апаттардың алдын алу.

«Акцияның бірінші күні жол қозғалысы ережелерінің 677 рет бұзылғандығы анықталды. Оның ішінде 11 жүргізуші мас күйінде көлік жүргізгені үшін ұсталды. Көлік жүргізу құқығынан айырылған 10 адамның рульде отырғаны, 56 жағдайда жылдамдықтың шамадан асырылғаны, 5 жағдайда рұқсатсыз көлікті қайта жабдықталғаны, 67 жағдайда қауіпсіздік белбеуінің тағылмағандығы, 40 жағдайда жүргізушінің рульде ұялы телефонмен сөйлескендігі анықталып, әкімшілік хаттама толтырылды. Сонымен бірге, маневр жасаудың 24 оқиғасы анықталды, 36 жүргізуші техникалық тексерудің болмағаны үшін жауапқа тартылды. Жолаушыларды заңсыз тасымалдаудың бір жағдайы тіркелді. Арнайы тұраққа 18 авто-мото-көлік құралы қойылды», - деді ведомстовдан.

Акция барсында жаяу жүргіншілердің жол қозғалысы ережелерін сақтауына да ерекше көңіл бөлінді. Жедел алдын алу іс – шарасының бірінші күні жол қозғалысы ережесін бұзған 116 жаяу жүргінші жауапқа тартылды.

Тәртіп сақшылары жол қозғалысының барлық қатысушыларынан жол қозғалысы ережелерін мүлтіксіз сақтауды сұрайды!