13:24, 11 Мамыр 2022 | GMT +6
«Қазақстан ЕАЭО-дан шығу туралы бастама көтерді» - ақпарат фейк
НҰР-СҰЛТАН. ҚазАқпарат – Әлеуметтік желіде Қазақстан Еуразия экономикалық одағының Кеден одағынан шығу туралы бастама көтергені жайлы ақпарат тарап жатыр. Бұған «Қазақстан мен Ресей арасындағы шешілмеген келіспеушіліктер» себеп болғаны жазылған. Stopfake.kz сайтының мәліметінше, бұл ақпарат – жалған, деп хабарлайды ҚазАқпарат.
«Қазақстанның жоспары туралы ақпарат шындыққа жанаспайды», – деп хабарлады ҚР Сауда және интеграция министрлігінің баспасөз қызметінен.
Бұл мәліметті ҚР Сыртқы істер министрлігі де теріске шығарды.
Stopfake.kz сайтының жазуынша, сондай-ақ Қазақстан ЕАЭО-дан шығуды жоспарлап отырғаны туралы мәлімдеме, оны таратқан автор өзінің жеке дереккөздеріне сүйенген. Бұл фейк ақпараттың белгілерінің бірі, өйткені дереккөзді анықтау және оны тексеру мүмкін емес. Ресми порталдарда және БАҚ-та Қазақстанның ЕАЭО-дан шығу жөніндегі жоспарлары туралы ақпарат жоқ.