Қазақстан Қытайға түйенің құрғақ сүтін экспорттай бастады

«Көлемі 3,5 тоннадан асатын Saubota құрғақ түйе сүтінің бірінші партиясын Ганьсу провинциясының Ланьчжоу қаласына жөнелтілді. Осылайша қазақстандық тауардың ҚХР-ға экспортталуының ресми бастамасы жүзеге асырылды. Осы сәтті біз 5 жыл күттік. Қытай нарығына кіру өте қиын болғандықтан, үлкен жұмыс жүргізілді», - деді «Евразия Инвест ЛТД» ЖШС бас директоры Қадырбек Мейрамбеков.

Бірінші қадам 2019 жылдың қыркүйегінде жасалды. Мемлекет басшысы Қасым-Жомарт Тоқаевтың сапары барысында Қазақстаннан Қытайға сүт өнімдерін экспорттау жөніндегі хаттамаға қол қойылды.

2020 жылдың қаңтар айында үш қазақстандық кәсіпорын ҚХР Бас кеден басқармасының импорттаушылар тізіміне енді. Олардың қатарында Saumal бренді бар «Евразия Инвест ЛТД» ЖШС болды.

Қарағанды облысында бие сүтінен ұнтақ өндіретін зауыт 2014 жылдан бері жұмыс істейді. Өткен жылы кәсіпорын түйенің құрғақ сүтін шығаруды игерді.

«Өткен жылы біз «Қорғас» ШЫХО-ға 609 млн теңгеге өз өнімдерімізді саттық. Сатылым биылғы жылы да артады деп үміттендік. Бірақ қаңтар айында шекара жабылды, қазіргі күнге дейін Қорғастың сауда алаңы жабық болды. Сондықтан, өндірісті сертификаттап, рұқсат рәсімдеп, қазір Қытайға бірінші партияны жібереміз», - деді Қадырбек Мейрамбеков.

Бас директордың айтуынша, зауыт айына 2 тонна құрғақ сүт өндіреді.

Қазақстан Республикасы Ауыл шаруашылық министрлігі мен ҚР Ауыл шаруашылық өнімдерін экспорттаушылар қауымдастығы компанияның Қытай нарығына ілгерілеуіне көмектескен.

Қауымдастық төрағасы Бауыржан Бакшиловтың айтуынша, қазақстандық сауда үйі Иу қаласында жұмыс істейді, жақын арада Сианда осындай алаң ашу жоспарлануда.

Құрғақ түйе сүтін Қытай еліне экспорттау тұрақты болады деп күтілуде.