Қазақстан мен Өзбекстан «Орталық Азия» сауда орталығын ашады
ОКҚ-да өткен баспасөз мәслихатында вице-министр атап өткендей, Орталық Азияда Қазақстанның негізгі стратегиялық серіктесі – Өзбекстан. Қазақстан қазіргі таңда Өзбекстанға құны 210 млн долларлық 70 тауар түрін шығара алады.
«Өзбекстанмен ынтымақтастық аясында «Орталық Азия» халықаралық экономикалық ынтымақтастық сауда орталығы жобасын жүзеге асыру жоспарланып отыр. Мерзім бойынша әзірге келіссөздер жүргізіліп жатыр. Біз бірнеше рет келіссөз жүргізіп, осы халықаралық орталық орналасады-ау деген 5 орынды таңдап алдық. Халықаралық орталық Қазақстан мен Өзбекстан шекарасында ұсақ көтерме және бөлшек сауданың жаңа форматын енгізуді, халықаралық туризмді дамытуды, логистикалық қызметтерді жетілдіруді және трансшекаралық іскерлік ынтымақтастық орнатуды көздейді», - деді вице-министр.
Қайрат Төребаевтың айтуына қарағанда, жоба аясында 10 мың жұмыс орыны ашылады. Ал сауда орталығы толыққанды пайдаға жараған уақытта жұмыспен қамтылғандардың саны 40 мың орынға дейін өсуі мүмкін.
Еске сала кетсек, бұған дейін Қайрат Төребаев Еуразиялық экономикалық одақ аясында Ресей нарығына енген отандық компаниялар бетпе-бет келген проблемаларын айтқысы келе бермейтінін мәлім еткен еді.