Қазақстан жаһандық Теңізге шығар жолы жоқ дамушы елдердің тобын басқарды
7 қаңтарда Қазақстан Теңізге шығар жолы жоқ дамушы елдердің (ТШЖДЕ) тобындағы 2020-2021 жылдарға арналған төрағалықты алып қабылдады. Төрағалық табыстау рәсімі БҰҰ жанындағы топқа мүше мемлекеттердің елшілері мен сарапшылары және Ең дамымаған елдер, теңізге шығар жолы жоқ дамушы елдер мен кіші аралдық дамушы мемлекеттер мәселелері жөніндегі БҰҰ Жоғары өкілі Фекитамоелоа Утоикаманудың қатысуымен өтті.
ТШЖДЕ тобына 32 ел, оның ішінде 16 ел Африка континентінен, 10 - Азиядан (Орталық Азия барлық бес елі мен Ауғанстан да), 4 - Еуропадан және Оңтүстік Америкадан екі мемлекет кіреді.
Қазақстан теңізге шығар жолы жоқ ең ірі ел, ол мұхиттардан ең алыс қашықтықта (шамамен 3750 шақырым) орналасқан.
Төрағалық ету кезінде Қазақстан 2014-2024 жылдарға арналған теңізге шығар жолы жоқ елдер үшін Вена іс-қимыл бағдарламасын және БҰҰ Орнықты даму мақсаттарын жүзеге асыруға транзит елдері, БҰҰ агенттіктері және басқа да мүдделі тараптармен ынтымақтастықты кеңейту арқылы өңірлік негізде белсенді түрде жәрдемдеседі.
«Төраға ретінде Қазақстан біздің Тобымыз және барлық мүдделі тараптармен, оның ішінде БҰҰ мекемелері, халықаралық қаржы институттары, жеке сектор мен ғылыми өкілдері арасындағы ынтымақтастықты қарқындату мақсатында барлық күш-жігерлерді салады», - деді Қазақстанның БҰҰ жанындағы Тұрақты өкілі Қайрат Омаров іс-шара барысында.
Сонымен қатар, ол Топты алдыңғы екі жыл басқарған Парагвайдың БҰҰ жанындағы Тұрақты өкілі Хулио Сесар Арриолаға осы лауазымдағы атқарған айтарлықтай жұмыс үшін алғысын білдірді.
Фекитамоелоа Утоикаманудың айтуынша, Қазақстан ТШЖДЕ тобының мүдделерін ілгерілету мен қорғауға әрдайым белсенді ұстанымда болғанын атап өтті. Сонымен бірге, ол Сауда мәселелері жөніндегі ТШЖДЕ министрлік кездесуі Дүниежүзілік сауда ұйымы 12-ші министрлік конференциясының шеңберінде 2020 жылы маусымда Нұр-Сұлтан қаласында Қазақстан Үкіметі ұйымдастыратынын хабарлады.
Қазақстан 2019 жылғы 25 қыркүйекте Нью-Йорк қаласында өткен ТШЖДЕ-нің министрлік жыл сайын кездесуі барысында Топтың төрағасы болып сайланды.
«Теңізге аумақтық қол жетімділіктің болмауы, әлемдік нарықтардан алыстау пен оқшаулану және жоғары транзиттік шығындар теңізге шығар жолы жоқ елдердің жалпы әлеуметтік-экономикалық дамуына айтарлықтай кедергі келтіруде. Олардың теңіздегі саудасы басқа елдер арқылы транзитке байланысты. Қосымша шекаралар өту және жаһандық нарықтардан қашықтық көлік қызметтерінің құнын айтарлықтай арттырады. ТШЖДЕ-нің алдында тұрған басқа негізгі сын-тегеуріндерінің бірі - әлсіз инфрақұрылым, экономикалық шағын нарықтар, климаттың өзгеруіне осалдық, ақпараттық-коммуникациялық технологияларға қол жетімділіктің болмауы және т.б», делінген хабарламада.
