Қазақстан жемқорлықпен күресте Орталық Азияда көш бастап тұр – Иордания елшісі

«Қазақстанның сыбайлас жемқорлыққа қарсы күрес жұмыстарымен біз таныспыз. Оның дәлелі халықаралық рейтингте Қазақстан 180 елдің ішінде 94 орынға ие болды. Яғни бұрынғыдан 9 позицияға көтерілген. Сыбайлас жемқорлықпен күресте Қазақстанды Орталық Азия елдерінің ішінде көш бастап тұр десек болады. Өз кезегінде Иордания бұл жаңалықты қуана қабылдайды», - деді Юсуф Мустафа Абдельғани «Antikor» алаңында онлайн өткен баспасөз мәслихатында.

Сұхбат барысында белгілі болғандай, қазақстандық «AntikorNews» жобасы Иорданияда да жүзеге асырылып жатыр.

«AntikorNews» - өте қажетті жоба. Біздегі адалдық және сыбайлас жемқорлыққа қарсы күрес комитеті осы жобамен танысып, қызығушылық танытып отыр. Яғни, өзара тәжірибе алмасу көзделуде. Қазақстанда сыбайлас жемқорлықпен күрес заңнамасы жыл сайын жетілдіріліп отырады. Біз бұны БАҚ арқылы естіп-біліп отырамыз. Соның бірі сіздерде мемлекеттік қызметкерлерге сый-құрмет көрсетуге тыйым салынған. Сіздердегі тағы бір жаңалық, қол астындағы қызметкердің жемқорлық әрекеті үшін басшының тікелей жауап беруі немесе қызметінен кетуі», - дейді ол.

Сондай-ақ, елші жемқорлыққа қарсы күресте профилактикалық іс-шаралардың маңызына тоқтала келе, алдын алу шараларын мектептен бастау керектігін алға тартты.