20:21, 21 Ақпан 2021 | GMT +6
Қазақстандық режиссер түсірген өзбекше тарихи сериал көрерменге жол тартты
ТАШКЕНТ. ӨзА-ҚазАқпарат - Өзбекстан Мәдениет министрлігінің тапсырысы бойынша түркиялық «Bo‘zdag‘ film» студиясы таспалаған «Мендирман Жалолиддин» тарихи сериялы жарыққа шықты, деп хабарлайды ҚазАқпарат ӨзА агенттігіне сілтеме жасап.
Алғашқы сериясы 14 ақпанда көрерменге жол тартқан туынды Хорезмді билеген Жалолиддин Мангубердінің өмірі, қолбасшылық еткен дәуірі мен тарихи шайқастары жайлы баяндайды. Десе де, сериалдың басты арқауы Хорезмшах пен Шыңғысханның шайқасына негізделген.
13 бөлімнен тұратын тарихи картинада басты рөл - Хорезмшахты түрік актері Эмре Кивилджим сомдаған болса, ұлы Шыңғысхан образын өзбектің белгілі актері Джавахир Закиров бейнелеген. Ал, сериалды қазақстандық режиссер Нұрғиса Әлмұрат түсірген.
Тарихи туындыны әр аптаның жексенбі күні кешкі сағат 20:30-да «Милли ТВ» арнасынан көруге болады.