Қазақстандықтар алкоголь, газ және дәрі-дәрмектен жиі уланады - дәрігер

Алматы қалалық жедел жәрдем ауруханасы токсикология бөлімінің бастығы Гүлмира Тойбаеваның айтуынша, жазатайым оқиға кезінде көз жұмғандардың саны бүгінде азаймай отыр. Оның ішінде алкогольді ішімдіктен улану көш бастап тұр.

«Статистикаға сүйенсек, пациенттердің басым бөлігі алкоголь өнімдерінен уланған. Бірақ 90-шы жылдармен салыстырғанда, спирттік ішімдіктен уланғандар саны едәуір азайды », - дейді дәрігер.

Екінші орында - дәрі-дәрмектен улану.

«Шынын айту керек, елімізде дәрі-дәрмектен улану фактісі жиі орын алады. Көбіне психотропты дәрілерден уланады. Парацетамол, аспирин, димедрол ішіп уланғандар бар. Соңғы екі жылда димедролдан улану азайды. Есесіне парацетомолдан улану көбейді. Бұл дәрінің гепатотоксикалық әсері бар», - деді ол.

Улы газдан улану - үшінші орында. Дәрігердің айтуынша, оның себептері әртүрлі, бірақ ең көп тарағаны - пеш қондарғыларын пайдалану кезінде өрт қауіпсіздігі ережелерінің бұзылуы.

Сонымен қатар, есірткі затынан уланғандар жиі кездеседі. Бұл өлімге әкеледі. Өткен жылы республикада өлімнің орташа деңгейі 3,5% құрады. Дүниежүзілік көрсеткіштермен салыстырғанда, әлемде өлім-жітімнің орташа деңгейі 4%-7% дейін.

«Өңірлерге келетін болсақ, улану фактісі БҚО, Алматы, Ақтөбе, Қостанай, Павлодар және Шығыс Қазақстан облыстарында жиі тіркеледі. Ал арнайы мамандандырылған бөлімдер ашылған аймақтарда – Алматы, Нұр-Сұлтан қалалары мен ОҚО-да өлім-жітім деңгейі едәуір төмен», - деп түсіндірді ол.

Спикердің айтуынша, Алматыда өлім көрсеткіші 2014 жылдан бастап 2018 жылға дейін 0,4% төмендеді.