ҚХЛ: «Барыс» «Адмиралды» жеңді

Естеріңізге сала кетелік, қазір «Барыс» құрлықтық хоккей лигасы тұрақты кезеңіндегі жалпы турнир кестесінде 82 ұпаймен алтыншы орында тұр. Плей-офф кезеңіне берілетін жолдамаға бірнеше тур бұрын қол жеткізіп қойды. Ал «Адмирал» 20-орында келеді .

Айта кетерлігі, «Адмирал» соңғы жеті кездесудің алтауында қарсыластарына есе жіберіп қойды. Қуанарлығы, «Барыс» соңғы сегіз ойынның жетуінде қарсыластарын қапы қалдырды.

«Барыстың» бас бапкері Андрей Скабелка құрлықтық хоккей лигасы тұрақты кезеңіндегі соңғы екі ойынында қазақстандық жастардың әлеуетін байқап көруге шешім қабылдады. Команда құрамында барлық шеп бойынша өзгерістер болды.

Бас бапкердің бұл тәуекелі өз жемісін берді. Жастар өздерін жақсы қырынан таныта білді. Ойынның 4-минутында «Барыс» сапынан Валерий Орехов мергендік танытты. Ал 6-минутта оның командалық әріптесі Павел Акользин есепті үстемелей түсті. Сол 6-минутта елордалық хоккейшілер тағы бір мәрте қарсыласын қапы қалдырды. Ал 36-минутта Константин Глазачев есеп айырмасын қысқартты. Ойында «Барыс» қарсыласынан 3:1 есебімен басым түсті.

Айта кетерлігі, соңғы төрт кездесуде елордалық клуб аталған қарсыласын жеңе алмай келген еді. Елордалық хоккейшілер сол кеткен есені қайтарды. Сондай-ақ, шығыс конференциясында Ресейдің «Авангард» командасын арта салып, екінші орынға көтерілді. Жалпы турнир кестесінде тқртіншы орынға жайғасты.

Енді «Барыс» құрлықтық хоккей лигасы тұрақты кезеңінде 26 ақпанда Хабаровскінің «Амур» командасымен ойнайды. Ал 1 наурызда плей-офф кезеңі басталады. Әзірге «Барыс» командасына кімнің қарсылас атанатыны белгісіз.