Көкшетауда ұлттық мұраны насихаттайтын облыстық көрме өтті

Елбасының «Болашаққа бағдар: рухани жаңғыру» мақаласын жүзеге асыру шеңберінде қолға алынған шараға Нұр-Сұлтан, Көкшетау, Степногорск қалары және облыстың 12 ауданынан келген 11-17 жас аралығындағы жасөспірімдер қатысты.

Көрмені Ақмола облыстық білім басқармасының қолдауымен Өнерпаз дарынды балалармен жұмыс жүргізу жөніндегі облыстық оқу-әдістемелік орталығы ұйымдастырды.

Жеңімпаздар «Жарамсыз материалдардан жасалған бұйым», «Табиғи материалдардан жасалған бұйым», «Тұрмысқа арналған креативті бұйымдар», «Ұлттық колориті бар интерьердің ерекше дизайн-жобасы: үйдің, бөлменің, саяжайдың, ландшафтының және т.б.», «Матадан жасалған бұйымдар (құрақ техникасы, жұмсақ ойыншық және т.б.)», «Өңірдің көркемдік және халықтық қолөнері» тәрізді алты аталым бойынша анықталды. Оны ҚР Суретшілер одағы және Еуразия дизайнерлер одағының мүшелері, доценттерден құралған кәсіби қазылар таңдады.

«Мен мұндай деңгейдегі көрмеге бірінші рет қатысып отырмын. Өзі жұмысымда қазақ халқының тұрмыс салтын, ұлдар мен қыздардың өмірін көрсеткім келді. Мен өз туындымда фетр және фоамиран маталарын қолдандым. Осындай шараға қатысу үшін ата-бабаларымыздың салт-дәстүрін, әдет-ғұрпын білуіміз керек», -дейді көрмеге қатысушы, Макинск қаласындағы 9-сынып оқушысы Юлия Новикова.

Көрме қорытындысы бойынша, Жүзім Мұхамбаева, (Астрахан ауданы), Диана Әбдрахманова (Зеренді ауданы), Елена Ғабидулинна (Сандықтау ауданы), Алина Кудрявцева (Степногорск қаласы) бірінші, Гауһартас Тұрсымбаева (Жақсы ауданы), Никита Касьянова (Бурабай ауданы), Ксения Ермакова (Шортанды ауданы), Вероника Павленко (Атбасар ауданы) екінші, ал, Денис Берязниченко (Степногорск қаласы), Гүлнұр Естай (Шортанды ауданы), Данагүл Мұрат және Максим Машевский (Астрахан ауданы) үшін орын иеленді.

Бірінші орын алғандар ағымдағы жылдың 2-3 қарашасы аралығында Шымкент қаласында өтетін республикалық байқауда бақ сынайтын болады.