Көкшетауда жеңіл атлектика манежі пайдалануға берілді

Жеңіл атлетика манежінің іргесі сонау 1989 жылы қаланған. Тоқсаныншы жылдардың басында манеж жекенің қолына өткен. Оны мемлекет меншігіне қайтару мәселесі көтерілгеніне де көп уақыт өтті. Нәтижесінде 2018 жылы манеж жоғары спорттық шеберлік мектебінің балансына берілді. Енді міне, еліміздің басты мерекесі – Тәуелсіздік күні қарсаңында есігін айқара ашып отыр. Нысанның ашылуына аймақ басшысы Ермек Маржықпаев қатысып, құттықтау сөз сөйледі.

«Біз бүгін көріп отырғанымыздай, жеңіл атлетика манежі құлпырып шыға келді. Бұл нысан спортшыларымыздың жеңіл атлетикаға құлшынысын арттырады», - деді аймақ басшысы Е.Маржықпаев.

Нысанның ашылуында аймақ басшысы өңірде жеңіл атлетиканың дамуына елеулі үлес қосқан Әбдрахман Әбдірәшитов, Қазақстан Республикасының еңбегі сіңген жаттықтырушысы, Ақмола облысының жеңіл атлетикадан аға жаттықтырушысы Василий Чуйко және КСРО-ның спорт шебері, Алмагүл Әділовті марапаттады.

Сонымен қатар, өңірде спортты дамытуда азаматтық ұстаным және ынтымақтастық тұрғысынан жауапкершілік танытқан Олег Анисимовқа алғыс білдірлді.

Жаңа нысанда Нұр-Сұлтан қаласы, Солтүстік Қазақстан, Қостанай және Ақмола облыстарынан келген спортшылардың қатысуымен жарыс өтуде. Онда 2002-2003 жылдар туған 200-ге жуық жасөспірім 60 м, 200 м, 400 м, 800 м, 1 500 м, 3 000 м қашықтыққа жүгіріп, күш сынасуда.