18:31, 25 Ақпан 2020 | GMT +6
Қызылордада Абайға арналған танымдық кеш өткізілді
ҚЫЗЫЛОРДА. ҚазАқпарат - Бүгін Ә.Тәжібаев атындағы облыстық әмбебап ғылыми кітапханасы қазақтың ұлы ақыны Абайдың туғанына 175 жыл толуына орай «Әлемдік ойдың алыбы» тақырыбында әдеби - танымдық онлайн-кеш ұйымдастырды, деп хабарлайды ҚазАқпарат тілшісі.
Бұл Абай атындағы Шығыс Қазақстан облыстық кітапханасымен бірлесіп өткізілді.
Шара барысында Ә.Тәжібаев атындағы облыстық әмбебап ғылыми кітапханасының директоры Нұржамал Мырзамұратова құттықтау сөз сөйлеп, Қорқыт Ата атындағы Қызылорда мемлекеттік университетінің оқытушылары Айман Айтбаева мен Б.Байжанова ақын шығармашылығы мен зерттеулеріне тоқталды. Кездесуге қатысушылар Абай мұрасыдағы сирек кездесетін кітаптармен, олардың ішінде 1936 және 1939 жылдарда шыққан латын графикасындағы басылымдарға ерекше назар аударды. Абай мен оның ұрпақтарының өмірінен айтылған қызықты деректерді қызыға тыңдады. Кітапханашылар ақын өлеңдерінен үзінділер оқыды.
Бұдан бұрын Қызылордада Абай қолданған заттар қойылған жылжымалы көрме ашылған болатын.