Қызылордада карантин талабын бұзған 5 нысан иесі жауапқа тартылды
Өңірде бұл мақсатта 24 мониторингтік топ құрылған. Топ мүшелері жыл басынан бері карантин талабын бұзған 7 оқиғаны тіркеді.
«Сырдария және Жаңақорған аудандарында жеке тұрғын үйде той жасамақ болған тұрғындар тиісті заңдылықты сақтамаған. Осындай олқылықтарға жол берген 5 халыққа қызмет көрсету нысанының иесі жазаланды. Халыққа қызмет көрсету орындарындағы карантин талаптарын бұзушылықтың басым бөлігі санитария талаптарының сақталмауына байланысты болған. Сонымен қатар, шекті уақыттан асырып жұмысын жалғастырған нысандар да бар», - деп мәлім етті Қызылорда облысы санитариялық-эпидемиологиялық бақылау департаментінің баспасөз қызметі.
Анықталған карантин талабын бұзу деректері бойынша ҚР Әкімшілік құқық бұзушылық туралы кодекстің 425-бабының 1-бөлігімен айыппұл салынды. Оның жалпы сомасы 569490 теңгені құрайды.
Сондай-ақ, Қызылорда облысы санитариялық-эпидемиологиялық бақылау департаментіне жаңа басшы тағайындалды.