Лифтіде әйелін соққыға жыққан астаналық ер адамға қатысты қылмыстық іс қозғалды
2022 жылғы 19 мамыр 12:24

Лифтіде әйелін соққыға жыққан астаналық ер адамға қатысты қылмыстық іс қозғалды

НҰР-СҰЛТАН. ҚазАқпарат – Нұр-Сұлтан қаласында лифт ішінде әйелді соққыға жыққан ер адамға қатысты қылмыстық іс қозғалып, тергеу амалдары жүріп жатыр, деп хабарлайды ҚазАқпарат тілшісі қалалық Полиция департаментінің баспасөз қызметіне сілтеме жасап.

«Өтінішке сәйкес Нұр-Сұлтан қаласы полиция департаменті «Есіл» ауданының полиция басқармасы ҚК-нің 107-бабы (Денсаулыққа қасақана ауырлығы орташа зиян келтіру) бойынша қылмыстық істі тіркеді. Жүргізілген сот-медициналық сараптамаға сәйкес, жәбірленушінің денсаулығына орташа ауырлықтағы зиян келтірілген», - делінген хабарламада.

Келіп түскен ақпаратқа сәйкес, бүгінде тергеу амалдары жүріп жатыр.

«Күдіктіге қатысты «ешқайда кетпеу және өз әрекетіне жауап беру туралы қолхат» түрінде бұлтартпау шарасы қолданылды. Өзге ақпарат тергеу мүддесіне сай жария етуге жатпайды», - дейді аталған ведомстводан.

Айта кетсек, әлеуметтік желіде лифтіде белгісіз біреудің қыз баланы теуіп, ұрып жатқан видеосы тараған еді.

Еске сала кетсек, бұған дейін Ішкі істер министрлігі тұрмыстық зорлық-зомбылық көбінесе отбасылық жанжалдан туындайтынын хабарлаған еді.



Ұқсас жаңалықтар
Автор:
Тілші

Jańalyqtar

MURAǴAT