Мақтааралда инфрақұрылым жүйелері қалпына келтірілді
Облыс әкімдігінің мәліметінше, шағын ауданда ауыз су, кәріз, электр, газ, байланыс, ағын су желілерін құру және абаттандыру жұмыстары қарқынды жүргізілуде. Жаңадан салынып жатқан ықшам ауданға инженерлік инфрақұрылым тартылып, Фирдауси, Өргебас, Жеңіс және Жаңатұрмыс елді мекендерінде ауыз су жүйелері қалпына келтіріліп жатыр. Халықты сапалы ауыз сумен қамту мақсатында 8 шақырымға жуық су жүйелері өткізілген. 24,4 шақырым электр желісі тартылып, 156 жарық шам орнатылған. Электр жүйелерін өткізу жұмыстары 95% жүзеге асқан. Сондай-ақ, негізгі тас жолдар мен көше жолдарында асфальт төсеу жұмыстары жүріп жатыр. Аталған жұмыстарды ұдайы бақылап отырған аймақ басшысы Өмірзақ Шөкеев құрылыс барысының сапалы да барлық талаптарға сай жүргізілуін жүктеді. Жаңа ауданда жарықтандыруға күш салуды тапсырды.