Мемлекет басшысының барлық тапсырмалары уақтылы орындалады – Асқар Мамин
«Президент Қасым-Жомарт Тоқаевтың тапсырмасы бойынша Үкімет әлеуметтік-экономикалық даму болжамын әзірледі. Республикалық бюджеттің жобасы дағдарысқа қарсы шараларды толық көлемде іске асыруға мүмкіндік береді. Мемлекет басшысының барлық тапсырмалары қажетті қаржыландырумен қамтамасыз етілген және уақтылы орындалатын болады», - деді Премьер-Министр.
Осы орайда А. Мамин Үкімет жағдайды қатаң бақылап отырғанын, елдің әлеуметтік-экономикалық тұрақтылығын қамтамасыз ету үшін барлық қажетті ресурстар бар екенін атап өтті.
Айта кетейік, бүгін Үкімет отырысында 2020-2024 жылдарға арналған әлеуметтік-экономикалық даму болжамы және 2020 жылға арналған республикалық бюджет, сондай-ақ ҚР Президенті Қасым-Жомарт Тоқаевтың биылғы 31 наурыздағы тапсырмаларын іске асыру аясындағы дағдарысқа қарсы шаралардың қосымша топтамасы қаралды.
Бұдан бұрын хабарланғандай, Премьер-Министр Үкімет дағдарысқа қарсы бірқатар шараларды іске асыратынын мәлім етті.
Салыққа жасалатын жеңілдіктер 700 мыңнан астам кәсіпкерлік субъектісіне қолданылады.
Еске сала кетейік, бұдан бұрын хабарланғандай, ҚР Президенті Қасым-Жомарт Тоқаевтың республикалық телеарналардың эфирінен еліміздегі төтенше жағдайға және мемлекеттің дағдарысқа қарсы іс-шараларына байланысты мәлімдеме жасады.
Осы орайда зейнетақы, мемлекеттік жәрдемақы және атаулы әлеуметтік көмек мөлшері 10 пайызға индексацияланатыны айтылды.
Өзін-өзі жұмыспен қамтығандар мен ресми тіркелмей жұмыс істейтіндер де 42 500 теңгеден алады.