Министр жүлдегер спортшыларға баспана беру тәртібін түсіндірді

Бүгін Парламенті Сенатының жалпы отырысында «Қазақстан Республикасының кейбір заңнамалық актілеріне дене шынықтыру және спорт мәселелері бойынша өзгерістер мен толықтырулар енгізу туралы» Заңы екі оқылымда қаралып, қабылданды.

«Заң жобасында Олимпиада, Паралимпиада және Сурдлимпиада ойындарының чемпиондары мен жүлдегерлеріне 10 жыл мерзімге жалға беру негізінде тұрғын үй ұсыну, сондай-ақ допинг-тестілерді сақтау мерзімі 10 жыл болуына байланысты осы мерзімге аталған тұрғын үйді иеліктен шығаруға тыйым салу көзделген. Егер осы кезеңде сынамаларда допинг анықталмаса, тұрғын үй спортшының меншігіне берілетін болады», - деді А. Райымқұлова Сенаттың жалпы отырысында.

Оның сөзіне қарағанда, Олимпиада, Паралимпиада және Сурдлимпиада ойындарының чемпионы немесе жүлдегері болып саналатын спортшы қайтыс болған (қаза тапқан) жағдайда, допингтік сынаманың нәтижесіне қарамастан, мұрагерлерінің тұрғын үйді өтеусіз алуы көзделген.

Бұдан бұрын хабарланғандай, Ақтоты Райымқұлова допинг үшін спортшылар мен жаттықтырушыларды қандай жаза күтіп тұрғанын айтты.

Айта кетейік, 2013 жылдан бастап жұмыс істеу кезеңінде қазақстандық спортшылардың допингті қолдануының 307 оқиғасы анықталды.