+7 (701) 759 90 19
USD 435.76 EUR 493.41
RUB 5.89 CNY 68.37
Jańalyqtar

Нұрлан Ноғаев жаңа аудандарда мектеп пен балабақшаның жоқтығын сынға алды

2021 жылғы 8 қазан 21:25
Бөлісіңіз:
Нұрлан Ноғаев жаңа аудандарда мектеп пен балабақшаның жоқтығын сынға алды

АҚТАУ. ҚазАқпарат – Маңғыстау облысының әкімі Нұрлан Ноғаевтың төрағалығымен өңірдегі құрылыс индустриясының дамуы талқыланған жиын өтті, деп хабарлайды ҚазАқпарат тілшісі.

Ұқсас жаңалықтар
Елордада тұрғын үй меншік иелері бірлестігінің орталығы ашылды «Елорда көршілері» тұрғын үйді басқару және дамыту бағдарламасы іске қосылды Алматының «Зерделі» ықшамауданында 20 үйдің іргетасы нығайтылады

Кездесуге облыстағы құрылыс компанияларының басшылары мен мемлекеттік орган өкілдері қатысты.

Жиын барысында Нұрлан Ноғаев қала салуда қарапайым талаптардың сақталмай отырғанын сынға алып, Ақтау қаласының әкіміне, облыстық құрылыс басқармасы мен қала құрылысы және жерді бақылау басқармасының басшыларына тексеру жүргізіп, құрылыстардың бас жоспарға сай орындалуын қамтамасыз етуді тапсырды.

«Халық жекелеген шағынаудандарда құрылыстың өте тығыз салынып жатқанын айтуда. Тұрғындардан жаңа шағынаудандарда мектеп пен балабақшалардың жоқтығына қатысты шағым да көптеп түсуде. Олар балаларын қайда апарады? Түсінемін, сіздер пайда тапқыларыңыз келеді, бірақ олай болмайды ғой. Бұл үйлерді тұрғызғанда не ойладыңыздар? Қала құрылысының ретсіз салынуы – бұл бірінші кезекте халықты құрметтемеу», - деді Н. Ноғаев.

Сонымен қатар аймақ басшысы өңірде кейбір нысандардың жобалау-сметалық құжатынсыз салынып жатқаны туралы ақпарат барын айтты.

«Қалаған жерге зәулім сарай көтере берсек, бас жоспардың қажеті не? Барлық құрылыс заң аясында жүргізілуі тиіс. Бұл жауапты органдардың өзара заңсыз келісімінің салдары. Мәселені анықтап, тиісті шара қабылдауды тапсырамын», - деді аймақ басшысы.

Жиында үлескерлер мәселесі де көтерілді.

«Кейбір құрылыс компанияларының жауапсыздығынан тұрғындар зардап шегуде. Алаяқ компаниялардың арбауына түскен жүздеген адам баспанасыз қаламыз ба деп қауіптенеді. Маған, менің әріптестеріме құрылысшыларға үйлерді аяқтауды міндеттеуді сұрап, күніне бірнеше адам хабарласады. Қолмен жасағанды мойындарыңызбен көтеріңіздер. Шамаларыңыз келмесе міндеттеме алмаңыздар. Осындай мәселенің алдын алу үшін жергілікті атқарушы органдар мен құқық қорғау органдарының басшыларында барлық мүмкіндік бар, жұмыстаныңыздар», - деді Нұрлан Ноғаев.

Облыс әкімі сондай-ақ, Президент тапсырмасына сай игерілмей жатқан жерлерді мемлекетке қайтару қажеттігін айтты. Осы орайда орынбасары Ғалымжан Ниязовқа облыс көлеміндегі бос жерлерге мониторинг жүргізіп, кері қайтаруды тапсырды. Заң аясында әрекет етіп, бұл мәселеде босаңсуға болмайтынын мәлімдеді.

«Тұрғындар тарапынан Шетпе маңындағы карьерге қатысты да шағым түсті. Қиыршық тас өндіретін карьерлерден шаң көтеріліп, адам денсаулығына зиян келтіріп жатқанын айтуда. Тексеру жүргізіңіздер. Мұнда прокуратура өкілдері отыр, солармен бірлесіп, заң аясында тиісті шара қолданыңыздар», - деп қорытындылады Нұрлан Ноғаев.


Біздің каналымызға жазылыңыз:

Бөлісіңіз:

Автор:

Қаракөз Марат

Ұқсас жаңалықтар
Сондай-ақ... оқыңыз
Пікір қалдыру
+7
Жіберу
ONLAIN QYZMETKERLER
REDAKTOR
Жарылқасын Саягүл
Жарылқасын Саягүл
954-059

MURAǴAT