21:18, 11 Мамыр 2022 | GMT +6
Өзбекстан Қазақстаннан ақша аударымы ең көп жасалған елдердің үштігіне енді
ТАШКЕНТ. ҚазАқпарат – 2022 жылдың бірінші тоқсанында Қазақстаннан шетелге ақша аударымдары жүйесі арқылы 189,5 млрд теңге ($442,8 млн) жіберілді, деп хабарлайды ҚазАқпарат меншікті тілшісі.
Finprom.kz деректері бойынша, бірінші тоқсанда Түркия, Өзбекстан және Қырғызстан Қазақстаннан ақша аударымдарын жөнелту бойынша ең танымал бағыттарға айналған.
Қаражаттың жартысына жуығы екі елге ғана жіберілді: Түркияға (52,3 млрд теңге) және Өзбекстанға (38,6 млрд теңге). Көшбасшылар үштігін ҚР-дан жіберілген 33,2 млрд теңге қаржы көлемімен Қырғызстан аяқтайды.
Порталдың мәліметінше, ҚР-дан аударылған қаражат бойынша бұған дейін бірнеше жыл бойы көш бастап келген Ресей 28,5 млрд теңге аударым көлемімен небәрі төртінші орынды иеленді. Бұл өткен жылмен салыстырғанда 36,2%-ға аз.
Бесінші орында Грузия. Аударым көлемі – 13,3 млрд теңге, бұл бір жыл бұрынғыдан 4,3 есеге артық.