19:03, 15 Сәуір 2021 | GMT +6
Өзбекстанда вакцина алғандарға анықтама беру сервисі іске қосылды
ТАШКЕНТ. ҚазАқпарат – COVID-19-ға қарсы вакцина алған Өзбекстан тұрғындары енді Мемлекеттік қызметтердің бірыңғай порталынан анықтама ала отырып, өз мәртебесін растай алады, деп хабарлайды ҚазАқпарат меншікті тілшісі.
Вакцина салғаны туралы анықтама алуға қатымты тиісті қызмет my.gov.uz сайтында іске қосылды. Қызметті пайдалану үшін Мемлекеттік қызметтердің интерактивті бірыңғай порталына тіркелу жеткілікті.
Тіркелгеннен кейін «COVID-19-ға қарсы вакциналау мәртебесін тексеру» деген мемлекеттік қызметке өтіп, «Тексеру» батырмасын басу қажет.
Еске сала кетейік, Өзбекстанда коронавирусқа қарсы жаппай вакциналау 1 сәуірде басталды. Екі апта ішінде 300 мыңнан астам адамға екпе салынған. Халықты вакциналау сәуірде ірі қалаларда, мамырда аудан орталықтары мен шағын қалаларда, маусым айында ауылдық жерлерде жүреді.
Авторы Мәдибек Жәнібеков