Өзге ұлт жастары Абайдың өлеңдерін жатқа оқыды
Салтанатты шарада университетте білім алатын өзбек ұлтының студенттері ұлы Абайдың өлеңдерін жатқа оқып, сахналық қойылымдар ұсынды. Биыл Қазақстанның Өзбекстандағы жылы қорытындылануына сәйкес екі елдің әндерін шырқап, өз өнерлерін паш етті. Университет ректорының тәрбие ісі жөніндегі орынбасары Нұрбол Әбсеметов шараға жиналған жастар мен қонақтарды Ұлы дала елінің ұлық мерекесі - Тәуелсіздік мерекесімен құттықтады. «Осындай елдік мерекенің маңызы Қазақстан мен Өзбекстан арасындағы татулықтан-ақ көрініс табары сөзсіз. Екі ел Мемлекет басшыларының арасындағы түрлі меморандумның нәтижесінде биылдың өзінде Шымкент қаласына 10 мыңға жуық студент оқуға келді. Соның біршамасы біздің оқу орнында білім алуда. Олар сабақтан тыс уақытта университетіміздің жанынан ашылған «Тіл үйрету орталығында» қазақ тілі курсын оқиды», - деді Нұрбол Әбсеметов. Аталмыш университеттің «Тіл үйрету орталығының» меңгерушісі Ерлан Құдайбергенов болса өзбек студенттері қазақ тілі курсында оқығанына небәрі үш айдың жүзі болғанымен, сахнада көрсеткен өнері мен мәнерлеп оқыған өлеңіне қарап жоғарғы баға беруге болатынын айтып өтті. Іс-шара соңы концерттік бағдарламаға ұласты.
