11:24, 20 Қараша 2019 | GMT +6
Павлодарлық жасөспірім хоккей матчында айдынға бәтеңкесін лақтырып жіберді
ПАВЛОДАР. ҚазАқпарат –16 жастағы павлодарлық шайбалы хоккейден «Ertis» пен «Astana» клубтары арасында өтіп жатқан матч кезінде айдынға бәтеңкесін лақтырып жіберді. Ата-анасы жауапқа тартылды. ҚазАқпарат бұл туралы Павлодар облыстық Полиция департаментінің баспасөз қызметіне сілтеме жасап хабарлайды.
Мәліметке сәйкес, жеткіншек жасаған әрекеті үшін ҚР Әкімшілік кодексінің 434-бабы (ұсақ бұзақылық) бойынша әкімшілік жауапқа тартылды. Енді ата-анасы 5 АЕК көлемінде айыппұл төлеуі тиіс.
Бұдан бөлек, айдын иелері - «Ertis» хоккей клубы да қомақты айыппұл төледі. «Трибуналардағы тәртіптің сақталуына дұрыс бақылау жүргізілмегені үшін атап айтқанда, мұз айдынына бөгде заттардың лақтырылуына байланысты «Ertis» хоккей клубына 350 мың теңге көлемінде айыппұл салынды», - делінген ақпаратта.
Полицейлер жыл басынан бері әртүрлі пранктер үшін 2 азаматты әкімшілік жауапқа тартқан.