08:59, 23 Қаңтар 2020 | GMT +6
Полиция департаменті елордалық жүргізушілерге үндеу жолдады
НҰР-СҰЛТАН. ҚазАқпарат – Нұр-Сұлтан қалалық полиция департаменті жүргізушілерді жолда абай болуға шақырды. Бұл туралы ҚазАқпарат департаменттің баспасөз қызметіне сілтеме жасап хабарлайды.
«Құрметті жүргізушілер, ауа райының нашарлауына байланысты көлік құралдарының қозғалысы үшін жекелеген жол учаскелері жабылды. Департаменттің жеке құрамы тұрғындарға көмектесу үшін жұмыс істеп жатыр. Елорда тұрғындарынан түсіністікпен қарауын сұраймыз: патрульдік полиция талабын орындауды, жеке көліктен бас тартып, қоғамдық көлікті пайдалануды, жеке көлікті жолға тастап кетпеуді және қар тазалау техникаларына кедергі келтірмеуді сұраймыз», - делінген ПД баспасөз хабарламасында.