Президент коронавирустың таралуы туралы: Тәуекелге барып отырмыз
«Мұндай жағдайда аймақ басшылары мен орталыққа бағынышты қала басшыларының жауапкершілігі едәуір салмақты сипатқа ие болуда. Турасын айтқанда – біз тәуекелге барып отырмыз. Бірақ бізде басқа амал да жоқ. Азаматтар үшін қатаң карантин режимі, студенттер мен мектеп оқушыларын, балабақша балаларын қашықтан оқыту – күшінде қалады. Қоғамдық орындарды дезинфекциялап тұру керек. Алайда кәсіпорындарды біртіндеп жұмыс режиміне ауыстырамыз», - деді Қасым-Жомарт Тоқаев Төтенше жағдай режимін қамтамасыз ету жөніндегі мемлекеттік комиссияның отырысында.
Осыны айта келе Мемлекет басшысы басты басымдық туралы ұмытпауды еске салды.
«Тағы да бір айтып өтейін: азаматтарымыздың денсаулығы – ең үлкен басымдық осы. Ортақ жұмысымызда осыны әрдайым есте сақтауымыз керек», - деді Президент.
Еске сала кетсек бұған дейін ҚР Президентінің баспасөз хатшысы Берік Уәли Қасым-Жомарт Тоқаевтың төрағалығымен Төтенше жағдай жөніндегі Мемлекеттік комиссияның отырысында ТЖ режимін сәуірдің аяғына дейін созуды тапсырғанын хабарлаған еді.