Сенаторлармен кездесуде кәсіподақтардың рөлін нығайту мәселелері талқыланды - Қарағанды
Парламент жоғары палатасының депутаттары «АрселорМитталТеміртау» АҚ-ның негізгі объектілерінде, атап айтқанда, № 3 домна пешінде және № 1 жалпақ темір цехында болған кезде кәсіпорын қызметімен және жұмысшылардың еңбек жағдайымен танысты.
Кәсіпорын басшылығымен және кәсіподақ ұйымының өкілдерімен мазмұнды әңгіме өрістеді. Жүздесу кезінде еңбек қауіпсіздігін қамтамасыз ету, өндіріс қуаттылығын жаңғырту, еңбекшілердің мүдделерін ілгерілетудегі кәсіби одақтардың рөлін нығайту мәселелері талқыланды. Сенат төрағасының орынбасары А.Шәкіров: «Қазіргі уақытта жоғарыда көрсетілген міндеттерді орындауда, оның ішінде жұмыскерлерді құқықтық қорғауды қамтамасыз етудегі, жұмыс берушілермен сындарлы диалог жүргізудегі кәсіподақ ұйымдарының рөлі жеткіліксіз деңгейде екені байқалып отыр. Кәсіпорындарда жиі орын алған апаттар пен жарақат алу жағдайлары, сондай-ақ құрал-жабдықтардың талапқа сай болмауы салдарынан өндіріс көлемінің төмендеуі алаңдаушылық туғызып отырғаны белгілі» деп атап көрсетті.
Сенат депутаттары халықтың әл-ауқаты қоршаған ортаға тығыз байланысты екеніне және зиянды шығарындыларды азайту жөніндегі қазіргі заманғы технологияларды енгізу жөніндегі Президент Қ.Тоқаевтың Қазақстан халқына Жолдауында атап көрсетілген шараларды қабылдау қажеттігіне кәсіпорын басшылығының назарын аударды.
Тұтастай алғанда, кәсіпорынды орнықты даму траекториясына шығару, өндіріс өлшемдері мен бәсекеге қабілеттілігін жақсарту, Теміртау қаласындағы экологиялық ахуалды қалыпқа келтіру жөніндегі тиісті шараларды қабылдау мәселелері сенаторлар сапарының нәтижесі бойынша «АрселорМитталТеміртау» АҚ жұмысының негізгі басымдығы ретінде айқындалды.
Депутаттар сондай-ақ Қарағанды медициналық университетінің клиникалық базасы – № 1 көпсалалы ауруханасында болып, стационар жағдайында медициналық қызметтер көрсетудің мультидисциплинарлық жүйесімен танысты, тұтастай алғанда өңірдегі клиникалық мамандық кадрларымен қамтамасыз ету деңгейіне, денсаулық сақтаудағы көпсалалы мекемелердің техникалық жабдықталуына назар аударды.
«Қарағанды медицина университеті» ҰАҚ Басқармасының төрағасы Р.Досмағамбетова жоғарғы оқу орнында білім берудіңі жаңа бағдарламаларды, сондай-ақ фармацевтика саласы бойынша білім беру мен медициналық менеджмент жөніндегі жобаларды сенаторларға таныстырды.
Аурухана қызметкерлерімен және университеттің профессор-оқытушылар құрамымен кездесу барысында мемлекет қабылдап жатқан мамандандырылған медициналық көмекті алуға қолжетімділік жөніндегі шаралар, атап айтқанда, Қазақстан Республикасының 2020-2025 жылдарға арналған денсаулық сақтауды дамытудың мемлекеттік бағдарламасы аясындағы шаралар талқыланды. Мемлекеттік және стратегиялық бағдарламалар бойынша көрсетілетін дәрігерлік қызметтерді ұсынудың жаңа сипатына көшу, денсаулық сақтау ұйымының жұмысын оңтайландыру, сондай-ақ медициналық білім беруді жетілдіру жүзеге асады.
Кездесу барысында 2020 жылғы 1 қаңтардан бастап күшіне енген міндетті әлеуметтік медициналық сақтандыру жөніндегі заңнамадағы жаңалықтарды талқылауға ерекше мән берілді. Өткен жылғы қыркүйектен бастап Қарағанды облысының медициналық ұйымдарында міндетті әлеуметтік медициналық сақтандыру жүйесіне пилоттық байқау жасалды. Өңірде міндетті әлеуметтік медициналық сақтандыруды енгізудің нәтижелері депутаттарға көрсетілді.
Жұмыс сапары еліміздің Ішкі істер министрлігінің Б.Бейсенов атындағы Қарағанды академиясында одан әрі жалғасты. Оқу орнының басшылығымен және профессор-оқытушылар құрамымен кездесу барысында құқық қорғау жүйесіне реформа жүргізу, оған сәйкес «Ішкі істер органдарын жаңғырту бойынша жол картасын» қабылдау жөнінде пікір алмасылды.
Кездесуге қатысушылар полицияны мемлекеттің қарулы құралынан азаматтардың қауіпсіздігін қамтамасыз етуге арналған, қызмет көрсететін органға айналдыру жөніндегі Мемлекет басшысы алға қойған маңызды міндеттің аясында басымдыққа ие мәселелерді талқылады.
Академия басшысы А.Дәрменов оқу бағдарламалары мен арнайы курстарға енгізілетін тәжірибеге негізделген жаңалықтар туралы баяндады.
А.Шәкіров: «ІІМ Қарағанды академиясы кәсіби кадрлар даярлаудағы маңызды мекемелік жүйенің бірі болып табылады. Жоғарғы оқу орнының қалыптасқан беделі мен мәртебесін қолдап отыру арқылы қызметін жетілдіру, оның ішінде терроризм мен экстремизммен күрес саласындағы әлемдік сын-қатерлерді, сондай-ақ азаматтардың сенімін туғызатын полиция қызметкерінің үлгісін қалыптастыруда қазіргі заманғы үрдістерді ескеру аса маңызды», - деп атап өтті.
Депутаттар өз сөздерінде қылмыстық, қылмыстық-процестік заңнаманы жетілдіру мәселелері бойынша маңызды заңнамалық өзгерістер мен толықтырулар енгізу; жеке адам құқықтарын қорғауды күшейту; қылмыстық процесс пен жазаларды орындау жүйесін одан әрі ізгілендіру және жазалауды азайту туралы айтты.
Ал Сенат депутаттары Мұратбай Жолдасбаев пен Абдалы Нұралиевтің Жамбыл облысындағы жұмыс сапары Байзақ ауданында жалғасты.
Сенаторлар тұрғындармен кездесулерде заңнамадағы өзгерістер туралы және «Педагог мәртебесі туралы» жаңа заң мен Қазақстан Республикасының Білім және ғылым, денсаулық сақтау саласын дамытудың 2020-25 жылдарға арналған мемлекеттік бағдарламасының негізгі ережелерін түсіндірді.
Абдалы Нұралиев Парламенттің жоғары палатасының заң шығару қызметі туралы хабардар етіп, заңнамадағы есірткі саудасына, мас күйінде көлік жүргізуге, кәмелетке толмаған балаларға зорлық-зомбылық көрсету мен мал ұрлығына қатысты өзгерістерге назар аударды.
Парламентшілер сондай-ақ жергілікті жастардың ресурстық орталығының жұмысымен танысты. Депутаттар аудандық жұмыспен қамту орталығында көп балалы аналарға жаңа жүйе бойынша атаулы әлеуметтік көмек төлеу ережелері туралы айтып, тұрғындар арасында осындай түсіндіру шараларын өткізудің маңызды екенін атап өтті. Жиналғандар өздерінің көкейкесті сұрақтарына жан-жақты жауап алды.
Парламент жоғары палатасы депутаттарының жұмыс сапары Сарыкемер ауылының спорттық-сауықтыру кешенінде аяқталды. Мұратбай Жолдасбаев кездесу барысында жұмыс сапарының мақсаты туралы айтып, облыстағы өзекті мәселелер бойынша жүзеге асқан депутаттық сауалдарға тоқталды.