ШҚО-да құтқару операцияларына арнайы жаттыққан иттер тартылуда

ШҚО Төтенше жағдайлар департаменті баспасөз қызметінің мәліметіне сүйенсек, бүгінде құтқарушылармен бірге Барбарелли Кастелфранко, Миллениум Стар, Хит, Вильсон және Алеся лақапатты 5 ит жұмыс істейді.

«Олар күшік кезінен құтқару операцияларына дайындала бастайды. Бұл ұзақ уақытты және табандылықты қажет ететін процесс. Иттер әртүрлі төтенше жағдайларда зардап шеккендерді іздейді. Олар орман мен тауларда жоғалған адамдарды жылдам табуға сеп болуда. Шығыс Қазақстан көшкін және сел қаупі жоағы өңірлердің бірі екендігі белгілі. Егер тауда қандай да бір төтенше жағдай болса, онда төрт аяқты көмекшілерді пайдаланамыз», - дейді құтқарушылар.

Департаменттің кинолог-мамандары қызметтік иттерді дайындауда тәжірибесі зор. Дайындық мақсатында практикалық сабақтар да өткізіледі.

Негізінен иттердің арасында Лабрадор тұқымының орны ерек. Ол өзінің инстинктімен, адамға деген сүйіспеншілігімен, батылдығымен, ақылымен ерекшеленеді. Сондай-ақ сағатына 5 шақырым жылдамдықпен жүзе алады.

«Өңірдегі кинологиялық қызмет республика бойынша алғашқылардың бірі болып құрылды. Қазір мұндай иттер ҚР Төтенше жағдайлар министрлігінің әрбір құтқару бөлімшесінде бар. Сондықтан жыл сайын иттер арасында жарыстар ұйымдастырылып тұрады. 2019 жылы Хит лақапатты ит республикалық додада 2 орын алған», - делінген ведомство мәліметінде.

Осы жылдың басынан бері облыстық ТЖД-ның иттері 4 іздестіру-құтқару операциясына қатысты.