ШҚО-да соңғы бес жылда музей қоры 22,5 мың жәдігермен толықты
Аймақ басшысы Даниал Ахметовтың айтуынша, осы бағдарламаның арқасында Қазақстанның жетекші археологтері Зейнолла Самашев пен Әбдеш Төлеубаевтың жетекшілігімен Шығыс Қазақстанның бірегей археологиялық ескерткіштері – Берел, Елеке Сазы, Шілікті, Көкентау зерттелді.
«Жұмыс нәтижесі бойынша қола, ерте темір, ерте және кейінгі орта ғасыр кезеңдерін сипаттайтын құнды артефактілер табылды. Облыстық тарихи-өлкетану музейінің қоры 22,5 мыңнан астам жәдігермен толықты. Зерттеу нәтижелері бүкіл Еуразия кеңістігіндегі ғылыми қоғамдастықтарда мойындалды», - деді ол.
Даниал Ахметовтың сөзінше, осы жылдың 27 қыркүйегінде Ұлыбританияның Лондон шаһарында «Ұлы дала алтыны» көрмесі ұсынылған.
«Көрмеге ата-бабаларымыздың мәдени және археологиялық жетістіктерін сипаттайтын алтыннан жасалған 15 мыңнан астам артефакт қойылды. Бұл көрме қалың жұртшылық пен ғылыми қауымдастықты бірегей жәдігерлермен таныстырып қана қоймай, Қазақстан мен Ұлыбритания Корольдігі арасындағы мультимәдени алмасу тізбегінің бір буынына айналды. Осылайша, біз әлемдік қоғамдастық үшін Ұлы дала көшпенділері тарихының жаңа беттерін ашып келеміз, олар біздің ата-бабаларымыздың әлемдік өркениеттің қалыптасуына қандай үлкен үлес қосқанын көрсетеді», - деді облыс әкімі.