ШҚО полицейлері төрт күнде 45 мас жүргізушіні ұстады

ШҚО Полиция департаменті баспасөз қызметінің мәліметіне сүйенсек, өңірде қоғамдық қауіпсіздікті қамтамасыз ету, қылмыстың алдын алу мақсатында 23-30 қараша аралығында «Құқықтық тәртіп» жедел алдын алу шарасы өткізіледі.

24 қараша күні Өскемен қаласындағы Жеңіс даңғылында полиция қызметкерлері «NISSAN LAUREL» автокөлігінің 25 жастағы жүргізушісін тоқтатты. Ол көлікті мас күйде басқарған.

Келесі күні сағат 23.20-да Шемонаиха қаласындағы Повстанческая көшесінде ішімдік ішіп алып «MERCEDES BENZ» көлігін тізгіндеген 27 жастағы жүргізушісі ұсталды.

«Алдын алу шараларының жүргізіліп жатқанына қарамастан аймақ бойынша мас күйінде көлік айдайтындар әлі де аз емес. Небәрі 4 күннің ішінде 45 мас жүргізуші әкімшілік жауапқа тартылған», - деді ШҚО ПД жергілікті полиция қызметінің бастығы Талғат Нұриев.

Естеріңізге сала кетсек, осыған дейін Шығыс Қазақстанда «Құқықтық тәртіп» жедел алдын алу шарасының бірінші күнінде 1500-ден астам әкімшілік құқық бұзу фактісінің анықталғаны хабарланған.

https://kaz.inform.kz/news/shko-da-bir-kunde-1500-den-astam-akimshilik-kukyk-buzu-faktisi-anyktaldy_a3722849