Шымкент полицейлері мереке қарсаңында күшейтілген режимде жұмыс істеуде
Тәртіп сақшылары мереке күндері қарсаңында түрлі құқық бұзушылықтың алдын алу және жолын кесу мақсатында «Құқықтық тәртіп» жедел-алдын алу іс-шарасын өткізуде.
Үшінші мегаполистің полицейлері ҚР Президенті Қасым-Жомарт Тоқаевтың «Сындарлы қоғамдық диалог - Қазақстанның тұрақтылығы мен өркендеуінің негізі» Жолдауында айтылған азаматтардың құқықтары мен қауіпсіздігін қамтамасыз ету туралы тапсырмасын тұрақты түрде назарға алып, жүйелі жұмыстар жүргізуде. Қоғамдық тәртіпті сақтау бағытында бірқатар рейд ұйымдастырып, азаматтардың еркін жүріп тұруына жағдай жасауда.
Желтоқсанның 9-шы жұлдызынан бастау алған «Құқықтық тәртіп» жедел-алдын алу іс-шарасы барысында ізін суытпай 115 қылмыс ашылды. Оның ішінде бұрын жасалған 5 қылмыс, тыйым салынған заттарды ұстап жүру бойынша 7 жайт тіркеліп отыр. Сондай-ақ, 1296 әкімшілік құқық бұзушылық анықталып, ұсақ бұзақылық жасаған 202 адам жазаланды. Бұл қылмыстар ішінде 413 - спирттік ішімдік ішу немесе қоғамдық орында мас болып жүру, 6 - қарсы бағытқа шығу, 531 - көші-қон заңнамасын бұзу болып отыр.
Бұдан бөлек, жалға берілетін 268 пәтер тексеріліп, оның ішінде салық органдарында тіркеусіз тұрғын үйді жалға берудің 268 жайты анықталған. Қабылдап-тарату орындарына - 10 адам, ал уақытша бейімдеу және уытсыздандыру орталығына - 72 азамат жеткізілді.