Шымкентте Тәуелсіздік күні мерекесінде ардагерлер құрметке бөленді
Салтанатты шара барысында Ерлан Айтаханов шаһардың тыныс-тіршілігіне бей-жай қарамай, ұдайы игі бастамалардың бел ортасында жүрген аға буынның еңбегі ерен екенін атап өтті. Сондай-ақ, егеменді ел болып қалыптасудағы еңбектерін айрықша бағалайтынын жеткізді.
Мерекелік жиында ҚР Парламенті Сенатының депутаты Н.Бекназаров, қалалық мәслихаттың хатшысы Ғ.Ташқараев, «Nur Otan» партиясының Шымкент қалалық филиалы төрағасының бірінші орынбасары Б.Нарымбетов те бірқатар еңбек ардагерлерін марапаттады. Екінші дүниежүзілік соғыстың қатысушылары мен тыл еңбеккерлері сынды қаланың 300-ге жуық ардагері мерекелік дастарханда бас қосты. Қазыналы қариялар Тәуелсіздікке дейінгі өмірлерін еске алып, бүгінгі ұрпақтың бейбіт және тәуелсіз елде өмір сүріп жатқандарын атап өтті.
Егемендік алу жолындағы Тұңғыш Президент - Елбасы Нұрсұлтан Әбiшұлы Назарбаевтың еңбегінің орасан екенін тілге тиек етті.