21:28, 28 Қараша 2019 | GMT +6
СҚО ауылдарындағы үйлерге ауызсу тартылды
НҰР-СҰЛТАН. ҚазАқпарат - Солтүстік Қазақстан облысындағы 20 мың үйге ауыз су тартылды. Бұл туралы Орталық коммуникациялар қызметінде өткен брифингте айтылды.
«Бүгінгі таңда облысымыздағы 58 мың адам тұратын 20 мың үйге ауызсу тартылды. Бұл- барлық үйдің 26%. Егер ауыл шетінде су шығатын мұнара тұрса - статистика бойынша ол жерде су бар болып саналады. Мен үшін бұл жеткіліксіз. Ауыз су үй ішінде болуы керек», - дейді СҚО әкімі Құмар Ақсақалов.
Сондай-ақ, ол биыл 26 мың тұрғыны бар 41 ауылда 177 шақырымдық таратушы торапты қалыпқа келтіру жұмыстары жүргізіліп жатқанын айтты.
«1668 үй торапқа қосыла алады. Олардың 491-і үйге су тартып алды», - дейді ол.
Жалпы, облыста сумен жабдықтауға бөлінген қаражат 4,4 млрд теңгеге өскен.
«Келесі жылы қосымша 6,1 млрд теңге бөлініп, 3,6 мың үйде ауызсуға қосылу мүмкіндігі болады», - дейді облыс әкімі.