СҚО-да дәстүрлі «Солтүстік-2020» қысқы спорт ойындарының жеңімпазы анықталды

None
None
ПЕТРОПАВЛ. ҚазАқпарат – Солтүстік Қазақстан облысында екі айға созылған «Солтүстік-2020» қысқы спорт ойындарының финалдық кездесулері өтіп, жеңімпаз команда анықталды, деп хабарлайды ҚазАқпарат тілшісі.

СҚО Дене шынықтыру және спорт басқармасы баспасөз қызметінің мәліметінше, «Солтүстік-2020» ойыны өңірдегі басты спорттық іс-шаралардың бірі. Бірнеше мың әуесқой спортшының басын біріктіретін жарысқа облыстың барлық аудандары қатысып, кезең-кезеңмен жарысады.

Биыл «Солтүстік-2020» турнирінің қорытынды ойындары Тимирязев ауданында өтті. Тимирязев ауданына 13 ауданнан 40-ден астам спортшы жиналды. Олар шайбалы хоккейден, футзалдан, шаңғы жарысынан және шорт-тректен өзара мықтыны анықтады.

Қысқы спорттық мерекеге келгендерді облыс әкімінің орынбасары Руслан Әлішев құттықтады.

«Бүгінгі күні СҚО-да спортпен айналысуға бар жағдай жасалынған. Биыл бұл салаға бөлінген қаражат 32 % артты. Өткен жылы 21 спорттық нысан қолданысқа берілді. Биыл олардың қатарына тағы 48-і қосылады. Сонымен қатар облыста 400 хоккей корты бар. Оның 350-і ауылды жерлерде орналасқан. Барлық қатысушыларды қысқы спорт мерекесінің ашылуымен құттықтаймын. Тек қана биіктен көрініңіздер», - деді Руслан Әлішев.

Жергілікті кәсіпкерлер де «Туған жер» жобасы аясында спорттың дамуына өз үлестерін қосып келеді. Олар өз қаражаттарына Мағжан Жұмабаев ауданында екі спорт нысанын салды. Заградовка және Новоникольское елді мекендерінде жабық хоккей корттары пайдалануға берілді. Биыл Тимирязев ауданында кәсіпкерлер мен мемлекеттің бірлескен жұмысы нәтижесінде жабық корт салынбақ.

Ал үш күнге жалғасқан тартысты ойында жалпы командалық есепте бірінші орынды және кубок пен 300 мың теңгені 186 ұпаймен Ғ.Мүсірепов ауданы иеленді. Екінші орын мен 200 мың теңгені 142 ұпаймен Аққайың ауданы алса, Шал Ақын ауданының спортшылары үшінші орыннан көрінді. Оларға 100 мың теңге сыйға берілді. Ал спартакиада иелері – тимирязевтықтар 4 орынды місе тұтты. Оларға қысқы спорттық ойынды жоғары деңгейде ұйымдастырғаны үшін «Газель» автокөлігі табысталды. Келесі жылы «Солтүстік» облыстық қысқы спорт мерекесі Тайынша ауданында өтеді.


Соңғы жаңалықтар