Теңге жыл басынан бері 1,2 пайызға әлсіреді - Ұлттық банк
«Тікелей шетелдік инвестициялардың таза әкелінуі өткен жылғы көрсеткіш деңгейінде қалыптасып, 5,1 млрд доллар болды. Ол бейрезиденттердің кірістерін қайта инвестициялаумен және резиденттердің шетелдік еншілес ұйымдарынан капиталын қайтаруымен қамтамасыз етілді», - деді ҰБ төрағасы.
Оның айтуынша, портфельдік инвестициялар бойынша капиталдың таза әкетілуі 13 пайызға азайып, 9 айда 2,6 млрд доллар болды. Капиталдың әкелінуі Қаржы министрлігінің 3-тоқсанда 1,15 млрд еуроға еурооблигациялар шығаруымен және «Қазатомөнеркәсіп» ҰАК» АҚ жаһандық депозитарлық қолхаттарын сатумен қамтамасыз етілді.
«Ішкі валюта нарығындағы сұраныс пен ұсынысқа импорттың байқалып отырған өсімі және әлемдік шикізат нарықтарындағы баға құбылмалылығы әсер етті. Қазаннан бастап 11 қарашаға дейін теңгенің әлсіреуі бір доллар үшін 388,74 теңгеге дейін, яғни 0,2 пайыз болды. Бұл кезеңде теңге бағамы бір доллар үшін 388,05–390,12 теңге шегінде өзгерді. Жыл басынан бастап әлсіреу 1,2 пайызды құрады», - деді Е.Досаев.