+7 (701) 759 90 19
USD 424.99 EUR 504.21
RUB 5.81 CNY 65.66
Jańalyqtar

Теннис: Елена Рыбакина Истбурн турнирінің жартылай финалына шықты

2021 жылғы 25 маусым 01:48
Бөлісіңіз:
Теннис: Елена Рыбакина Истбурн турнирінің жартылай финалына шықты

НҰР-СҰЛТАН. ҚазАқпарат – Қазақстанның бірінші, әлемнің 21-ракеткасы Елена Рыбакина Истбурн (Ұлыбритания) WTA 500 турнирінің жартылай финалына шықты, деп хабарлайды ҚазАқпарат тілшісі.

Е.Рыбакина ширек финалда дүниежүзілік рейтингте 61-орында тұрған латвиялық Анастасия Севастовамен кездесті.

Бірінші партияда қос брейкке қол жеткізген латвиялық теннисші басымдылық танытты – 6:2.

Екінші сетте есеп 3:2 болған мезетте Е.Рыбакина брейк жасап кетті. Бірақ қарсыласы іле-шала жауап қайырды – 4:4. Содан кейін тағы бір брейк жасап, алға шықты – 6:5. А.Севастова матчқа доп бергенде, қазақстандық теннисші таразы басын қайта теңестірді – 6:6. Тай-брейкте Елена Анастасияның екі матчболынан сытылып, шыға білді – 7:6 (9:7).

Үшінші, шешуші партияда есеп 5:5 болғанда, Рыбакина брейк жасай алды – 6:5. Алайда қарсыласы да қалыспады – 6:6. Ақыры тай-брейкте Елена жеңісті жұлып алды – 7:6 (7:5).

Аса тартысты өткен бәсеке 2 сағат 31 минутқа созылды.

Е.Рыбакина жүлде қоры 565 мың АҚШ долларынан асатын жарыстың финалына шығу үшін тағы бір латвиялық, әлемнің 43-ракеткасы Елена Остапенкомен таласады. Ол ширек финалда ресейлік, әлемнің 34-ракеткасы Дарья Касаткинаны 1:6, 7:5, 6:2 есебімен тізе бүктірді.

Ең бастысы, осы додадан кейін басталатын Уимблдон турнирінде табысты өнер көрсету қажет-ақ. Бұл «Үлкен дулыға» жарысында Е.Рыбакина 19-ракетка болып тіркеліп отыр.

Еске сала кетейік, бұдан бұрын Е.Рыбакинаның Истбурнда әлемнің бесінші ракеткасын ұтқанын, А.Бубликтің жартылай финалға өте алмағанын жазған болатынбыз.



Біздің каналымызға жазылыңыз:

Бөлісіңіз:

Автор:

Елжан Ералы

Сондай-ақ... оқыңыз
Пікір қалдыру
+7
Жіберу
ONLAIN QYZMETKERLER
REDAKTOR
Айдар Оспаналиев
Айдар Оспаналиев
954-059

MURAǴAT