18:32, 25 Қаңтар 2020 | GMT +6
Теннис: Зарина Дияс әлемнің 10-ракеткасына есе жіберді
НҰР-СҰЛТАН. ҚазАқпарат - Қазақстандық Зарина Дияс Аустралия ашық чемпионатының төртінші айналымына шыға алмады, деп хабарлайды ҚазАқпарат тілшісі.
Дүниежүзілік рейтингте 73-орында тұрған З. Дияс үшінші айналымда әлемнің 10-ракеткасы, нидерландылық Кики Бертенспен күш сынасты.
Бірінші партияда бірден брейк жасаған Бертенс басымдылық көрсетті - 6:2.
Екінші сетте Зарина 4:2 есебімен алға шыққанымен, қарсыласы таразы басын теңестірді. Ақыры тай-брейкте Бертенс жеңіске жетті - 7:6 (7:3).
Бәсеке 1 сағат 35 минутқа созылды.
Осылайша Аустралия ашық чемпионатында жекелей сында Қазақстаннан ешкім қалған жоқ.
Еске сала кетейік, бұдан бұрын А.Бублик пен М.Кукушкиннің жұптық сында үшінші айналымға шыққанын, ал Ю.Путинцеваның жеңіліп қалғанын жазған болатынбыз.