Теннисші Елена Рыбакина Чехиядағы турнирде ұтылып қалды
Осы доданың 6-ракеткасы болып тіркелген Е.Рыбакина алғашқы айналымда дүниежүзілік рейтингте 75-орында тұрған ресейлік Дарья Касаткинамен кездесті.
Бірінші партияда қазақстандық теннисші брейк жасап, 2:0 есебімен алға шыққанымен, қарсыласы бұдан кейін қатарынан алты геймді алды – 6:2.
Есесіне екінші сетте Д.Касаткина брейкпен бастағанымен, Е.Рыбакина содан соң төрт геймді өз пайдасына жазды – 4:1. Ақыры оны сәтті аяқтай білді – 6:3.
Үшінші, шешуші партияда ресейлік спортшы брейкпен алға кетті – 3:1. Сол басымдылығынан айырыла қойған жоқ – 6:3.
Тартысты бәсеке 1 сағат 52 минутқа созылды.
Д.Касаткина жүлде қоры 528,5 мың АҚШ долларына бағаланған турнирдің ширек финалына шығу үшін әлемнің 26-ракеткасы, биылғы US Open турнирінің жартылай финалисі, америкалық Дженнифер Брэйди немесе рейтингте 29-сатыдағы Украинаның 20 жастағы жұлдызы Даяна Ястремскаяның біреуімен таласады.
Еске сала кетейік, бұдан бұрын Александр Бубликтің үздік елу теннисшінің қатарына қайта кіргенін жазған болатынбыз.