Токиода қазақ ұлттық орталығы ашылды
Жапониядағы қазақтар қауымдастығының төрағасы болып «Juntendo» университетінің клиникасында хирург болып жұмыс істейтін қандас Әбдібек Қалыбек сайланды.
Бүгін «Отандастар қоры» КЕАҚ және Жапония қазақтары қауымдастығы өзара ынтымақтастық туралы меморандумға онлайн режимде қол қойды.
Меморандум аясында мәдени-гуманитарлық жобаларды іске асыру, кәсіпкерлер арасында өзара байланысты жолға қою және ақпараттық қолдау жұмыстары жоспарлануда.
Іс-шараға ҚР Жапониядағы Төтенше және Өкілетті Елшісі Ерлан Баударбек-Қожатаев және осы елде тұратын этникалық қазақтар, оқып жатқан студенттер де қатысты.
«Отандастар қорының» вице-президенті Мағауия Сарбасов өз сөзінде шетелдегі отандастармен байланыстарды кеңейтудің маңыздылығын атап өтіп, олардың тілдік және этномәдени бірегейлігін сақтауға ықпал ететін Қоғам бағдарламалары туралы хабардар етті.
Тараптар қазақ тілін оқыту бойынша қысқа мерзімді курстарды жүзеге асыруға, Қазақстанның жоғары оқу орындарында қазақ балаларының білім алуына жан-жақты қолдау көрсетуге, қазақ қолөнерін дамыту және ілгерілету бағытында қолдауды қамтамасыз етуге, Жапония және Қазақстан кәсіпкерлерімен кездесулер, семинарлар, конференциялар және бизнес-форумдар ұйымдастыруға көмек көрсетуге келісті.
