Төтенше жағдай режимін бұзған Қарағанды облысының үш тұрғыны 10 күнге қамалды
4 сәуір күні полиция қызметкерлері мен ҚМ әскери қызметшілері «Соқыр» бекетін дала арқылы айналып өтуге тырысқан 26 жастағы Қарағанды тұрғынын ұстады. Жігіттің айтуынша, ол ата-анасымен ұрысып, Балқаш қаласына дейін жаяу өткісі келген.
Полицейлер ұстаған тағы бір 26 жастағы Нұр-Сұлтан қаласының тұрғыны 6 сәуір күні Балқаш қаласына жұмыс бабымен бара жатып, өз автокөлігімен екі жолаушыны блокпост арқылы өткізбек болған.
Сол күні тағы бір 42 жастағы ер адам блокбекеттен өтіп кетпек болған.
«Құқық бұзушыларға қатысты барлық фактілер бойынша ҚР ҚК 476 бабы 1 тармағы бойынша әкімшілік хаттама жасалды. Қарағанды қаласының мамандандырылған ауданаралық әкімшілік сотының қаулысымен тәртіп бұзушылардың әрқайсысы 10 тәулікке әкімшілік қамауға алынды», - деп хабарлады Қарағанды облысы ПД баспасөз қызметі.
Қарағанды облысының полиция департаменті ҚР ӘҚБК 476-бабына сәйкес карантинді бұзғаны үшін айыппұл (10 АЕК немесе 26510 теңге) немесе 15 тәулікке дейін қамау көзделгеннін тағы бір мәрте ескертеді.
Қарағанды облысында барлығы 18 блокпост пен 17 санитарлық бекет жұмыс істейді. Олардың барлығы асханаға арналған үй-жайлармен, демалыс бөлмелерімен, биодәретханалармен, сондай-ақ жұмысқа қажетті техникамен және жабдықтармен жабдықталған.
Жергілікті атқарушы билік органдары блокпост пен санитарлық бекеттерде жұмыс істейтіндердің барлығын үш мезгіл тамақпен қамтамасыз етеді.