Түркістан облысында қоғамдық орындар дезинфекцияланып, шектеу күшейді
Жетісай ауданындағы барлық елді мекендерде көшелер мен орталық алаңдар, балалардың ойын алаңшалары мен саябақтар, скверлер мен дүкендер, базарлардың маңы күніне екі рет залалсыздандырылуда. Барлық жерде жауапты мамандардан арнайы штаб құрылып, атқарылатын жұмыстың жоспары пысықталып жатыр.
Ал, Сарыағаш ауданында вирус жұқтырған науқас тұратын Еңкес елдімекенінде карантин енгізіліп, қоршауға алынды. Дерттің таралмауына байланысты елдімекенде автокөлік құралдарының барлық түрлерінің және азаматтардың кіріп-шығуына тыйым салынды.
Барлық жолдар мен аяқжолдар, іргелес аялдама кешендері мен сауда алаңдарының аумақтары, елді мекеннің кіреберістері мен аулалар күнделікті дезинфекциялық режимге көшірілген.
Аталған індеттің таралуына тосқауыл қою мақсатында Бәйдібек ауданында да қауіпсіздік шаралары қолға алынған. Аудан орталығы Шаян елді мекеніндегі көшелер мен мекемелер және көпқабатты тұрғын үйлерді дезинфекциялау жұмыстары басталды.
Бұл жұмысты су бүркейтін автокөлік және арнайы киім киген жаяу жүргінші топ атқарып жатыр.