Түркістандық полицейлер боранда жолда қалған азаматтарға көмек беруде
Айта кетейік, бүгін таңғы төрттен бастап Түркістан облысында қалың қар жауып, қатты жел ұйытқып соқты. Үздіксіз соққан ақ түтек боранның салдарынан республикалық жолдарда көліктер көптеген қиындыққа тап болуда. Бет қарыған суық, ұйытқыған қар көліктердің қозғалуына кедергі келтіруде. Осыны ескерген Түркістан облысы полиция қызметкерлерінің жеке құрамы жолға шыққан және жолда қалып қойған жүргізушілер мен жолаушыларға көмек көрсету үшін жедел жұмылдырылды.
Ордабасылық тәртіп сақшылары қар құрсауында қалған жеңіл көліктерді өздерінің қызметтік көлігімен сүйреп тегіс жолға шығарып жатыр. Кейбір көлікте қалып қойған адамдарды жақын маңдағы жылы орындарға жеткізіп, қажетті көмек көрсетуде.
Ордабасы аудандық полиция бөлімі патрульдік полиция тобының қызмет инспекторы Ержігіт Қонарбаев жұртшылықты жолға шықпауға шақырды.
«Құрметті жүргізушілер боранда мейлінше сабыр сақтап, үйде отырғандарыңыз жөн. Алыс жолға мүлдем шықпаңыздар. Қар басып қалған бірқатар жол жабылып, автокөліктер жүрісін тоқтатып жатыр. Қысқы маусымда міндетті түрде көліктеріңізді мезгілге сай дөңгелекпен жабдықтаңыздар!», - деп ескертті полицей.
